ابني عنده خمس سنين ولاحظت عليه التالي

*لا
يسمع الكلام بالرغم من حبه لي وتأسفه لي بعد كل ما بيعمل حاجة غلط واقوله
انا زعلانة ويقولي مش حعمل كدة تاني وللأسف يكرر نفس الشئ بعدها كذا مرة

*مرة قولتله على الحاجة ما يعملهلش راح جري يعملها وهو بيقول أنا أسف وهو بيعملها

*من
صغره وهو كثير السرحان وقليل الانتباه.. ممكن ننادي عليه كذا مرة بدون
اجابة ودلوقتي ساعات نكون بنكلمه مش مركز في اللي بنقوله وساعات سامع بس
بيطنش ما بيردش

*حساس جدا من وهو صغير لو حد قاله كلمة يعيط وهو كاتم في نفسه وحنين

*ما بيقعدش ساكت أبدا الا لو معاه موبايل أو أمام التليفزيون بيبقى في عالم ثاني مش حاسس باللي حوله

هو
مش بيتنطط ويتشقلب بس بيعمل مشاكل يروح يسكب زجاجة الشامبو على الأرض يروح
يحط مكونات المطبخ على بعض مثلا زيت على خل ويقولي عملت مشروب.. الخ كنت
الأول بقول مش فاهم بس مع تكرار نفس الموقف كتير وفي كل مرة أعاقبه وكبر
أكيد بقى فاهم

*بحس عضلاته ضعيفة وبيتعب بسرعة وقف
قرب السنة وفي نفس التوقيت بدأ يحبو على مؤخرته مشي تقريبا سنة وشهرين اما
كنت أشيليه أوقفه وهو نونة ما كنش يفرد رجله كأن عضلات رجله مرتخية لحد ٩
أو ١٠ شهور بدأ ينط يرتفع عن الأرض وهو عنده ٤ سنين لحد دلوقتي بحس عضلاته
ضعيفة بطئ في الجري بقاله شهر ونص بيتمرن سباحة في خلال الفترة دي اشتكالي
من ظهره مرتين بعد التمرين مرة منهم ما كنش عارف يمشي من كتر وجع ظهره وفضل
ظهره يوجعه لتاني يوم مع انه ما بيبذلش مجهود جامد في التمرين

*في
تمرين السباحة لا يسمع كلام الكابتن وكل مرة اقوله لو كنت شاطر في التمرين
حجيبلك حاجة حلوة برضه ما بيسمعش الكلام وأما يخلص يقولي كنت شاطر وفي
التمرين كل ما يعمل حاجة غلط اشاورله يقولي اسف يمكن بيقولها أكتر من ١٠٠
مرة اسف خلال الساعة

*نزلته نشاط صيفي عشان يبعد عن
الموبايل والتلفزيون المعلم بيشتكي بيقول لو الدقيقة فيها ٦٠ ثانية هو
بيتكلم ٧٠ مرة في الدقيقة وبيقول انه كثير الحركة

*هو فعلا كثير الحركة ما بيعرفش يقعد ثابت في مكانه بدون ما يكون بيعمل حاجة

*مرة رجع من المدرسة متعور بقوله اتعورت ازاي قالي كنت ماشي على الترابيزة اقوله ليه يقولي كدة

*كل
ما يعمل حاجة غلط ونسأله ليه عملت كدة ما يبقاش عنده سبب يقول كدة بيعمل
تصرفات كتير خطأ بدون أي مبرر ومندفع في تصرفاته من غير ما يفكر في عواقبها

*قدرته على الحفظ جيدة بس لو رضي يقعد

*شاطر في المسائل الحسابية ما شاء الله ممكن يحل مسائل أكبر من سنه وبيحب الأرقام اتعلمها من على اليوتيوب

*مستواه الدراسي جيد بس بعلمه أو أحفظه الحاجة عن طريق فيديوهات من على اليوتيوب عشان دي الحاجة الوحيدة اللي بيقعد ويركز معاها

*الواجب
المدرسي كان بيبقى عنده كتابة الحروف ما كنش يقدر يقعد يكتبه مرة واحدة
يكتب حرف واحد و يقوم يجري مهما حفزت فيه لدرجة كنت اديله بونبوني على كل
حرف يكتبه عشان يرضى يكتب

*ما بيستوعبش خطورة الحاجة
ومهما قلتله ما يقتنعش بسهولة (مرة نزل من البيت لوحده بقوله ممكن عربية
تخبطك أو حد يخطفك يقول لا انا حمشي على الرصيف ومفيش حرامي بيأخذ أطفال)
وما بيأخذش حاجة جد معظم الحاجة بيقلبها هزار ولعب

*كل يوم يرجع من المدرسة ناسي حاجته والمعلمة بتقول عليه مهمل جدا وفيه الباص بيشتكوا منه انه كثير الكلام وما بيسمعش الكلام

*لسة ما بيعرفش يأكل نفسه كويس بالملعقة نص الأكل بيقع على الأرض وما بيعرفش يخلع لنفسه ملابسه العلوية

*حاولت ادخله حصص على زوم مش قادر يستنى دوره وعايز يفتح المايك ويتكلم

*بيحب يلعب بالمكعبات والألعاب عادي

*
عشري وبيلعب مع الأطفال عادي وبيتكلم مع الناس عادي لكن بيبعد عن الأطفال
العنيفة ولو طفل أذاه نادرا ما يحاول يدافع عن نفسه يقول دة مش بيحبني
بيميل للعب مع البنات لأنهم هاديين

آسفة على الإطالة لكني أريد أن أعرف هل هو طبيعي أم ماذا؟ وكيف أتعامل معه كي يسمع الكلام حيث اني جربت معه جميع الطرق تحفيز وترهيب؟