الاستشارة:

(الغرض هنا إني عاوزة أعرف دي أفكاري ولا لأ وهل أنا كفرت فعلاً)

أنا ممكن أتكلم عن الفترة دي لأن الصراع لسه موجود فـ أنا فاكرة إيه بيحصل معايا حالياً لأني دائماً بنسي الأفكار اللي بتجيلي والفترة الصعبة اللي مريت بيها لما الفترة دي بتعدي يعني علي أساس إن أنا اللي كنت مكبرة المواضيع وكده وإني تمام ومحصلش حاجة إحنا في ١٠ أيام مهمين جداً عند أي مسلم وأنا كمسلمة إن شاء الله يعني كنت عاوزة أعمل اللي ملحقتش أعمله في الـ ١٠ أيام بتوع السنة اللي فاتت

قبل العشر أيام حصل برضه إن خطر فكرة على دماغي أو كان ضيق كالعادة بيحصلي كل فترة وصراع بين أنا بعمل إيه هنا في الدنيا؟ ودوري إيه؟ وإيه المشاعر اللي المفروض أحس بيها ومتكنش اعتراض سواء بقى على قدر ربنا أو ظروف بمر بيها بمعنى أصح أنا عاوزة أكون إنسانة عارفة إيه واجباتها وإيه حقوقها اللي ربنا عاوزني أكون عليها ولأني بحس معظم الوقت إني حاسة باعتراض أو إن ربنا دايماً غضبان عليا والأفكار دي بتسببلي ضيق مبعرفش أطلع منه لفترات طويلة

فقولت خلاص تعالي نبحث ونشوف كدا البني آدم بيفكر إزاي ومطلوب منه إيه يعني أنا عاوزة دماغي تهدي بعلم ديني ونفسي فتوصلت إني أسمع لدكتور نفسي بس بيربط الدين وعلم النفس ببعض وسمعت كذا حلقة ومن ضمن الأهداف برضه اللي خلتني أدور على حاجات زي كدا أنا عاوزة أفهم نفسي وأفهم دماغي ليه بتفكر كدا طول الوقت على أمل إني أساعد نفسي يعني وكدا

المهم وصلت لحلقة الدكتور كان بيذكر كلام مريضة عنده كان عندها وسواس قهري في العقيدة وبيقول أنا سألتها علاقتك مع ربنا عاملة إزاي؟ هي كانت منتقبة فـ ردت بأسلوب اللي هو أنا! أنت شايف يعني أنا عاملة إزاي؟ إزاي تسألني السؤال ده يعني؟ أكيد علاقتي بربنا كويسة وكملوا الكلام لحد ما هي انفجرت وقالت أنا أصلاً مبحبش ربنا وأبويا وهي صغيرة أجبرها على الحجاب وحاسة إنها مظلومة وكدا

فـ أنا توقفت فجأة كدا وجالي فكرة يعني الأفكار اللي في دماغك دي مش غصب عنك ولا أنتِ ضدها زي ما بتقولي يعني أنتِ سبب كل الأفكار دي وعلشان أنتِ من زمان بتحسي إن ربنا دايماً ضدك وإن أنتِ شخص مش كويس وهو مبيحبكيش لدرجة إني بقيت بحس أنا كمان بعترض على ربنا استغفر الله العظيم يعني وإنه دايماً ظالمني ولما الأفكار دي بتجيلي بحس إني هتجنن وأستغفر الله العظيم وإزاي تفكري كده وحرب بقى بتقوم وأحياناً ببعد عن ربنا معرفش ده خوف من مواجهة ولا ده إحساس بإن أنتِ بجحة هتروحي تدعي إزاي وأنتِ لسه قايله عليه كدا ولا إن فعلاً أنا مش عاوزة أقرب

وبفضل في ضيق فترة لحد ما ربنا يأذن وبرجع تاني وبعيد نفس السيناريو يمكن بأفكار تانية يمكن بنفس الأفكار المهم آخر فترة دي بتاعة لما سمعت دكتور نفسي وكدا كانت أصعب كل مرة كنت معرفش الموضوع بيعدي إزاي وبرجع تاني لأني فعلاً بحب ربنا جداً وبجد نفسي أكون بعبده زي أي مسلم بيعرف يعبد ربنا حق عبادته

المهم الفترة دي كانت مختلفة لأني حسيت إني السبب عامةً كل مرة كنت بقول أنا السبب بس المرة دي زي كإن عندي دليل المهم قعدت فترة مبفكرش في الموضوع كل ما الفكرة تيجي أحاول ألغيها ومفكرش فيها يعني بخاصم نفسي بمعني أصح بصلي حركات بس بدون إحساس مش قادرة أدعي ولا أقول يارب حتي 

 دخلنا في العشر أيام وأنا عارفة إن المفروض أدعي براحتي لأن دي أيام استجابة بس أنا مش قادرة أعمل كدا جيت أول يوم أفتح المصحف علشان أقرأ قرآن حسيت إني مش قادرة أبص في المصحف حتى في اللحظة دي كانت مرعبة بالنسبالي واللي هو إزاي بيحصل كدا؟ وضيق تنفس بقى وإحساس بالخنقة وخوف أنا مش فاهمة ليه بيحصل كدا

بالمناسبة أنا من زمان جداً وأنا عندي صعوبة في إني أقرأ قرآن، بس كنت بجبر نفسي أحياناً بالرغم من الأفكار اللي كانت بتجيلي وأنا بقرأ قرآن وكلها أفكار أنا ضدها برضه وكانت بتضايقني جداً بس المرة دي برضه كانت مختلفة أنا مش قادرة أبص على الآيات حتى

المهم برضه أنا مش عارفة الأفكار اللي بتجيلي دي هل هي أفكاري بجد ولا مش أفكاري ؟هل فعلاً هي جاية من قناعتي ولا لأ؟ أحياناً كتير أو دي الفكرة الملحة على دماغي الفترة دي يمكن أنتِ كنتي بتقولي أستغفر الله العظيم وبتتضايقني من الفكرة وبتحاربيها بس علشان عقاب ربنا مش علشان أنتِ فعلاً ضدها دا بجانب طبعاً الأفكار الدائمة إن في ربنا ولا لأ وأحياناً شتايم علي ربنا وهنا فعلاً بحس إني خلاص كفرت أنتِ أصلاً كافرة أو كفرتي بالأفكار اللي بتجيلك دي طيب هاتي دليل علي مثلاً إن الإسلام هو الدين الصحيح وأروح أعمل سرش وأجيب دليل وأرتاح شوية وترجع الأفكار تاني أو أفكار غيرها

وأحياناً بحس إن العالم ده مش حقيقي اللي أنتِ بتفكري فيه ده مش حقيقي أنتِ عايشة في وهم وأحياناً بحس بجد إن أنا مش حقيقية المشكلة الأكبر بقى إن حتى لو سبب أفكاري دي إني مش عارفة ربنا وديني كويس أنا بجد مش عارفة أعرف مش عارفة أوصل وبحس لو أي إنسان خد المعلومة هيمشي بيها يمين أنا همشي بيها شمال هيطلع بيها خطوة أنا هرجه بيها خطوتين 

وفي صراع دائم مع لأ متفكريش كدا لأ كدا حرام لأ ربنا مش هيسامحنا طب خلاص ابعدي ومتحاوليش تقربي ولا تفهمي حاجة لأ أنا مش عاوزة أبقى كدا أنا عاوزة أقرب من ربنا وعاوزة أعرف دينه طب ما أنتِ لما بتيجي تقربي الدنيا بتتعك أكتر وهكذا وبجد بحس كل م أقرب الموضوع بيبقي أصعب وبالرغم من كل ده أنا دلوقتي الحمدلله حتي لو مش عاوزة أصلي أو مش قادرة بصلي برضه حتي لو مش طايقة نفسي وأنا بصلي لكن الأول كنت مجرد م الأفكار دي تيجي في دماغي وأحس إني مش قادرة أصلي مكنتش بصلي 

بحس حالياً أو دايماً إن الحل ربنا ياخدني علشان أخلص من الموضوع ده لأني عايشة فيه بقالي سنين ولو دخلت

النار أستاهل