عندي خوف ونفور من خطيبي!
46
الاستشارة:

السلام عليكم ورحمة الله وبركاته، بداية شكرا جزيلا لاتاحتكم الفرصة لي لمشاركة مشاعري، وأرجو من الله أولا ومنكم ثانيا المساعدة والإفادة. 

بداية أنا مش بكره فكرة الزواج، بالعكس انا نفسي اتزوج وانجب أطفال خصوصا أني شديدة العاطفة والحنان تجاه اي طفل وهما بيحبني جدااااا سواء أبناء إخوتي أو معارفي أو حتى اللي بقابلهم في الشارع. المشكلة هيا الرجل نفسه!

يعني طول ما الخطوبة لسة في البداية ولسة بنتعرف ببقى كويسة ومرتاحة، أول ما يبدأ الخاطب في الغزل أو التصريح ليا بحبه بتخض! بترعب! خصوصا ان دايما مبنبقاش كملنا اسبوعين خطبة حتى! دايما بلاقي الطرف التاني بيعترف بحبه ليا رغم اني شايفة ان لسة بدري! إنه ملحقش يعرفني كويس علشان يحبني! بحس إنه كذاب، وإن كل همه إنه يتزوج وخلاص علشان العلاقة الزوجية! ورغم إنها حلال، بس أنا بخاف وبنفر من الموضوع ده نفور شديد وعندي منه خوف يصل لدرجة الهلع! 

هوه أنا معروفة أني مرحة، وبميل للضحك والهزار طول الوقت، وبحب الجو يكون مبهج وجميل في حضوري، ده غير إني يعتبر جميلة نسبيا، فالكل بيقولي ان ممكن يكون ده السبب في سرعة تعلق الخاطبين بيا، بس أنا بدل ما افرح بالاعتراف بخاف وابتدي أنفر! خصوصا ان بيصاحب الإعتراف ده تعلق شديد منهم، وبيبقوا منتظرين مني طول الوقت إني أبادلهم الشعور ده، بس أنا عموما بحب أخد وقتي ومستعجلش! ده بيسبب فيما بعد مشاكل، وهعترف إني مبستحملش أصغر مشكلة بتحصل واقوم فاسخة الخطوبة! الغريب إني وعلى الرغم من إني عاوزة يكون ليا بيت وأسرة وأولاد وزوج طيب، برتاح لما بفسخ الخطوبة!

كنت الأول بقول لنفسي يمكن علشان محدش من اللي سبق خطبوني كانوا على قدر من الثقافه والعلم ولا اللباقة ولا عقليا ناضجين، وآني دايما بحس أني أنضج وأعقل!

دلوقتي ربنا رزقني بخطيب محترم وعاقل ومثقف ومتدين، وفيه صفات أكتر من رائعة، ومع ذلك اول ما اعترفلي بحبه بنفس السرعة برضه بغد اسبوع واحد من خطبتنا رجعتلي نفس المشاعر المرتعبة المنفرة! وهوه بدل ما كان وقور وهادي فجأة بقا عاوز يتكلم معايا طول الوقت وانا بدأت أتخنق! أنا شايفاه شخص رائع، وجوانا صوتين صوت بيقول إنه فعلا بيحبني مش مجرد بيقولها وخلاص! وصوت شاكك وييردد لا ده طلع زي اللي قبله وعاوز يتجوز وخلاص وعاوز العلاقة وبيعيش قصة حب خيالية علشان يقنع نفسه ويقنعني بيها! اصل ازاي بسرعة كدة يحبني؟ وأنا ليه محبتهوش بنفس السرعة دي؟ أنا خايفة أوي! مش عاوزة اخسره لأنه شخص كويس حسب اللي ظاهرلي منه والله أعلى وأعلم، بس قي نفس الوقت هموت من الخوف والقلق ونافرة من كتر ما هوه عاوزني اتكلم معاه كل شوية! أنا عامة بحب الهدوء وبحب يبقى ليا وقتي لنفسي ومبعرفش اعبر عن االي جوايا لحد بالكلام، بس بكتب وعرف اوصف المشاعر بدقة. أنا هبقى كويسة؟ ولا فعلا محتاجة علاج؟ ده غير ان خطيبي ده عاوز نتجوز خلال ٣ شهور وده زود عندي الخوف والنفوس! أنا بحب أخد الأمور بهدوء وهوه مستعجل ومشاعره مخلياه مستعجل أكتر! اعمل ايه؟ وازاي اطمن؟ إزاي اتغير؟ أزاي مخافش؟ ارجوكم ساعدوني! أنا مرعوبة!

مشاركة الاستشارة
04, يونيو, 2024 ,07:41 مسائاً
الرد على الاستشارة:

  • أوقاتك سعيدة -إن شاء الله- ومرحبا بك . 
  • ما يحصل معك جزء منه رد فعل طبيعي بحكم موضوع الخطبة والزواج هو مسؤولية وتحديد مصير ويجب على الشخص أن يفكر بالعقل قبل العاطفة ومرحلة الخطبة ما هي إلا مرحلة للتعارف والتأكد من قبولنا لهذا الشخص .
  • و لكن ردة فعلك تجاه الشخص الخاطب مبالغ بها ، ممكن أن تعود لأسباب متعلقة بمرحلة المراهقة والشباب وهي تأثير أفكار الدراما والأفلام ، أن الحب هو عذاب ومعاناة وسنين طويلة ولكن في الواقع على العكس تماما الشخص عندما يتقبل الطرف الثاني لا يوجد أي مشكلة بمصارحته .
  • أتمنى لك استقرار وحياة أفضل دون مخاوف أو تردد ، ما دمتِ منطقيا وعقليا أنت موافقة على هذا للشخص و مؤهلاته مناسبة لك لكن عليك أن تتخلصي من أي أفكار سواء تجارب أشخاص آخرين أو أفكار من التلفاز والمسلسلات .

مقال المشرف

عشر ذي الحجة

إن الحمد لله نحمده ونستعينه ونستهديه، ونعوذ بالله من شرور أنفسنا ومن سيئات أعمالنا، من يهده الله فهو ....

شاركنا الرأي

للتنمر آثار سلبية على صحة الطفل وسلامه النفسي والعاطفي. نسعد بمشاركتنا رأيك حول هذا الموضوع المهم.

استطلاع رأي

رأيك يهمنا: أيهما تفضل الإستشارة المكتوبة أم الهاتفية ؟

المراسلات