الاستشارة:
سلام عليكم ورحمة الله وبركاته
انا حاليا عندي عشرين سنة من زمان من اعدادي وانا عندي سلوكيات مش كويسة زي مثلا الانفعال الزائد علي اتفه الأسباب وعدم الثقة بالنفس بل ساعات كتير بحتقر نفسي وأنها أقل من كل اللي حواليها وبحس بعدم القيمة وكمان بحس أن مفيش حد حواليا بيحبني خالص حتي أهلي بشوف نفسي وحشة في عيونهم دا غير اني كان عندي عنف زائد تجاه الأشخاص وخصوصا الأصغر مني وأفكار شر كدا بس دا بدأ يهدي بعد ما التزمت من كذا سنة بس باقي الحاجات مستمرة لغاية دلوقتي بل بحس انفعالاتي بتزيد وعصبية جدا وبفهم الأمور أحيانا بشكل خاطئ وحساسة بشكل مفرط حتي مع أهلي
وعادات سيئة زي الكسل وكتر النوم
وبعيط كتير جدا بدون سبب يكاد كل يوم حرفيا وبحس نفسيتي مش مظبوطة خالص وبالرغم اني الحمد لله بقرب من ربنا وبحاول دايما بس مفيش حاجة من دي بتتغير وقبل ما التزم كنت بأذي نفسي زي اقعد اعض نفسي او أعورها بقلم أو حاجة بس بعد الالتزام بطلت بس عشان حرام ببقي عاوزة أعمل كدا بس بلجم نفسي
ومن فترة لقيت عندي حاجة غريبة زي اني بقعد أتكلم مع شخصيات وهمية في دماغي بصوت عالي وأرد عليهم وأقول كلامهم علي لساني ودا بيبقي أحيانا غصب عني زي نوبة كدا ودايما السيناريوهات اللي في دماغي بتبقي وحشة يعني انا بتأذي فيها وينتهي الأمر اني أقعد أعيط في الحقيقة وأنا أما ببدأ في التخيلات دي مش بقدر أوقف نفسي بسهولة ودا مثلا خلاني بقيت أدخل أوضتي كتير وأقفلها وأقعد أكلم نفسي في التخيلات دي وأصرخ وجت فترة الموضوع زاد أوي بقا ياخد كل وقتي
ولما بقيت أشوف الموضوع مش طبيعي أكيد مش كل الناس تخيلاتها كدا وخصوصا دا مش كلام مع نفسي دا كلام مع ناس خيالية في حاجة محصلتش بس انا بتعايشها بحثت شوية في الموضوع عرفت أن فيه حاجة شبه كدا اسمها متلازمة جوسكا أو اضطراب الوهم بس طبعا عارفة لازم دكتور اللي يشخص ف معرفش إذا كنت بعاني من المتلازمة ديوفيه حاجات حصلتلي في طفولتي انا متجاوزتهاش حاسة أنها السبب في اللي وصلتله واني شخصية غير سوية
زي مثلا تعرضي للتحرش من اكتر من شخص مختلف ودا استمر فترة
وتعامل أهلي العنيف معايا في الابتدائي منها أن والدتي حرقتني حرق جامد في رجلي دوب الجلد ولسة أثره موجود وفي رجلي الاتنين والضرب المبرح لغاية جسمي ما كان بيجيب دم ودا استمر لغاية الثانوي
تانية ثانوي
وكمان كلام صعب ومعايرات كتيرة جدا
وطبعا تصرفاتي دي أهلي كانوا بيفسروها أن دا طبع فيا واني شخصية سيئة بطبعي يعني ولحد دلوقتي بحس اني منبوذة منهم وانهم مش فاهميني
وحاجات تانية كتير في طفولتي لدرجة اني مش فاكرة ذكري كويسة منها وعلي العكس الناس كلها عمري ما أتمني ارجع مرحلة الطفولة تاني مع ان حياتي مش مظبوطة دلوقتي برضه
ف عاوزة أعرف هل اللي مريت بيه زمان ممكن يكون سبب في اللي بعانيه دلوقتي وهل لازم أتعالج منه
يعني لازم أشوف دكتور او أخصائي ؟
وكمان نسيت أقول لحضرتك اني بعاني من شئ زي الرهاب الاجتماعي كدا ومش بحب القرب في العلاقات
يعني مش بحب مثلا باباي يكون قريب مني زي يحضني أو كدا بالرغم أني بحبه جدا ويبقي نفسي أبقي في حضنه بس مش بعرف بحس اني متضايقة حتي اخويا الأصغر مني كدا مش بحس بأمان ولا لا
وعندي مشاكل في فهم نفسي وجلد الذات .