اناقة فتاة
361
الاستشارة:

السلام عليكم و رحمة الله و بركاته ، مابطول عليكم..

أحس أني مصابه بحاله نفسيه..بدأ لي هذا الشعور او السبب لما كنت بالإبتدائيه بالصف الأول كان زملائي يضحكون علي لأني ما أنطق الحروف زين ((ماعرف اتكلم مثل مايقولوا))مع العلم انا مافيني ثقل لسان كان فقط دلال زايد لأني كنت اصغر بنت و كان اصغر مني ولد بس هذي المشكله حليتها من لمن صرت صف الثالث الابتدائي الحمدلله تغلبت عليها بإرادتي ..و مو هي المشكله الأساسيه🙄 المشكله الثانيه اللي أعتقد انها سبب مشاكلي واني احس روحي فيني حاله نفسيه منها .. هو شكلي احياناً كانوا زملائي بالإبتدائيه يضحكون على شكل أنفي بس مو دائماً و طبعاً المشكله الأولى و المشكله الثانيه و الدلال اللي كان فيني خلاني اصير ضعيفة شخصيه ...
كانت اموري طيبه يعني صح أنجرح و ارجع من المدرسه ابكي ولا اشكي لأحد بس ماوصلت للحاله الي انا فيها لحين إلى ماوصلت إلى أول متوسط قررت اعزز من شخصيتي و شوي صار لي دور و قويت شخصيتي لكن ...صرت متينه بذاك الوقت و صحيح أن اللي بالمدرسه كبروا وصاروا مايعايرون لكن اللي فبيتنا ((اخواني و اخواتي و حتى امي كلهم بالمختصر))كانوا يضحون عله شكلي مثلا ((ام خشم/غبيه/محششه/قبيحه)) هذي الاشياء خلتني اكره اصور نفسي بأي كاميرا و اكره اشوف نفسي بالمرايه بس في حالة تذا كنت وحدي اطالعني بعدين اقول بس خلاص مابشوف واهرب..
وصلت لدرجة اني انزل راسي بالارض لما امشي وإلى الآن ماقدرت اتغلب على هذا الشي و اذا شفت ناس يتكلمون على طول يجي فبالي يتكلمون عن شكلي او اذا شفتهم يضحون اقول انهم يضحون علي .. وصلت ايضا لدرجة ماحط عيني بعين احد و اذا جيت اكلم اي شخص احط ايدي بنص وجهي عشان لايدقق علي 🥺 بس لحمدلله (حركة الايد) قدرت اتغلب عليها ..اما عن رفع الراس احيان ارفعه و احيان انزله و المرايه لحمدلله قدت اطالعني فيها بس اذا في ناس كانوا قدامي وصلت لدرجه اني اقارن شكلي معاهم و بعدين اقول هم احسن .. و التصوير اصور بعدين امسحهم مابقي شي و اتضايج..
قررت اني اركز بشي غير الشكل عشان ما اتعب نفسيتي فركزت على ملابسي و ترتيبي لكن اخواتي قعدن يقولن اني شايفه نفسي لدرجة حسيتهم يكرهوني من صدق يعني عادي القى وحده تشاهد تلفزيون و من اجي تقول اف و تتطلع أو كلهم يعرفون سالفه وانا معتبريني هامش محد يعبرني حتى وصلوا انهم يغتابوني جدامي و اذا صار عندي اشياء كثيره طول الوقت مايراعوني و يقولون لي تستاهلين..النتيجه من هذا فوق مانفسيتي و شعوري اللي احسه ابتعدت عنهم وصرت اجلس بروحي بس اطلع وقت الضروره اسولف مع نفسي و اتناقش مواضيعي وكل شي لوحدي ....
فوق الانطوائيه و ما اقدر اختلط مع الناس و شعوري بعدم الثقه بسبب شكلي و حساسي ان الكل يجيني لمصلحه و الكل يكرهني!صرت لما اشرح لأحد شي ما يفهمه!مدري ليه!؟ و اذا جيت اتكلم مع الناس يلتف لساني و يتشابكن الحروف!!امع العلم انا ماكنت اعاني هذا الشي عمري لحين عشرين و بالجامعه بس للأسف هذي اعراضي 🥺 مع ان فيني غمارات بس ما ابتسم ابداً و اذا ابتسمت اغطي وجهي ....

هل هذي اعراض حاله نفسيه؟
هل جلوسي بمفردي و التحدث مع نفسي و قلة استيعابي للأمور كما يقال ((استيعابي بطيء /انتي تفكيرك محدود)) سيسبب لي الشيخوخه المبكره او الزهايمر؟لأني صرت مافرق بين الحلم و الواقع يعني اشياء صارت لي حلم و انا احسبها صدق و العكس صحيح و انسى اشياء اذا مافتحت جوالي و شيكت حتى ملابسي اللي تحت انسى شنو لابسه و لاسيما ان احد من عايلتنا جاته فتره انطوى على نفسه ومن كثرة التفكير و الهم صابه خرف مبكر و هو بعمر اصغر من الاصابه بهذا المرض؟

مشاركة الاستشارة
07, ديسمسائاًبر, 2019 ,02:15 مسائاً
الرد على الاستشارة:

سلام الله عليكم
بعد التوكل على الله نقول :
هذه الحالة تعاني من مشكلة نفسية تسمى : ( اضطراب مفهوم الذات الجسمي ) ، ولأنها تأخرت في العلاج وبدت تظهر عندها أعراض نفسية أخر ى ، ننصح أن تتعالج على يد معالج نفسي متمكن ، وننصح أن يتم استخدام العلاج التكاملي لمدة شهرين بواقع ثلاث جلسات أسبوعيا .
خالص تحياتي .
البروفيسور : محمد العبيدي
استشاري الصحة النفسية .

مقال المشرف

ممنوع القراءة.. لغير المتزوجين الجدد

التهاني والتبريكات التي تبرعمت على الشفاه المحبة لكم، تزرع البهجة في قلوبكم المقبلة على الحياة بأثوا ....

شاركنا الرأي

للتنمر آثار سلبية على صحة الطفل وسلامه النفسي والعاطفي. نسعد بمشاركتنا رأيك حول هذا الموضوع المهم.

استطلاع رأي

رأيك يهمنا: أيهما تفضل الإستشارة المكتوبة أم الهاتفية ؟

المراسلات