حتى لاتنهدم مملكتنا .
33
الإستشارة:


بسم الله الرحمن الرحيم  
الحقونى قبل ما ينخرب بيتى ياريت لو فى ايدكم تساعدونى لانى تعبت تعبت والهى خلاص مش قادرة اتحمل انا مشكلتى الشك ثم الشك ثم الشك حيموتنى

انا ابوية و امى من جنسيات مختلفة بس امى مصرية و عايشين طول عمرنا فى مصر و ابويا طول عمرة مسافر بيجى زيارات كل سنة كل 6 شهور حسب شغلة كنا و احنا صغار بنحبة علشان كان بيجيب لنا هدايا بس لما كبرنا كرهناة لانة كل زيارة بيجى يقرفنا لانة بيتشدد علينا

 و كنت بقول لنفسى دة مغفل انا اقدر اعمل الى انا عايزاة و هو مش هنا لية هو دلوقتى بيعمل كدة ما علينا اتعرفت على واحد و حبيتة جنسيتة غير جنسيتى كمان و اول ما اتعرفنا كانت صحوبية و بس و حكا لى كل ماضية و طبعا ماضية مزفت بنيلة

 كان بيعرف ستات و بيسافر كتير لندن قبرص البحرين بلغاريا لبنان سوريا سافر كتييير و عرف ستات كتير وحكا لى عن اغلب الى عرفهم  المهم بدينا نحب بعض و اتعلقنا ببعض  وحبينا بعض جدا و انا بديت احس انة ملكى و خلاص الى فات فات

قابلتنا عقبات من اهالينا لانة الجنسيات مختلفة و مشاكل و صراعات لحد ما اهلنا وافقوا بالعافية بس مشكلتى اننا كنا كل شوية نسيب بعض و نرجع و نسيب و نرجع فى الاول السبب اهالينا و رفضهم بس بعد كدة السبب القوى كان شكى و غيرتى الزايدين عن حدهم

 وكنا كل ما نسيب بعض اسبوعين تلاتة هو يعرف واحدة يتسلى بيها تسلية يعنى مش واحدة بس كتير ودة كان بيزيد شكى فية خصوصا ان جنسيتة انا اتربيت على انها جنسية صاحبها يعشق الستات المهم بعد 3 سنين من الصراعات من اهلنا و الشك و غيرة اتجوزنا

 بس الشك زاد مع انة بطل يعمل حاجة حتى انا متجوزاة من 7 سنين عمرى ما شفتة مع واحدة و دايما افتش فى موبايلة و جهاز الكمبيوتر بتاعة كام مرة معدودين عالصوابع الى لقيت صور اباحية بس شكى كل يوم فى زيادة و اتخرب بيتى 3 مرات قبل كدة بسبب الشك بس الحمد لله مرتين منهم ما اتحسبوش
انا حوصف لكم شكى ازاى :

مثلا لو شفت مسلسل او فيلم عربى او اجنبى و جت فية واحدة حلوة و مغرية انا نار تضرب فى راسى و بطنى توجعنى و دمى يغلى و احس انى مش قادرة افكر كانى واحدة مش طبيعية مش بعرف اعمل كنترول على نفسى ولا على اعصابى و اقلب بوزى و احس ان نفسى اتخانق معاة انتقم منة لان من جوايا بحس ان المنظر عجبة مع انة بيغير المحطة بسرعة لما يلاقى حاجة زى كدة بس مش بثق فية

مثلا لو شفت واحدة عدت فى الشارع حلوة و مغرية و هو مش موجود اقعد اتخيل لو جوزى كان واقف مكانى كان حايعمل اية لو انا مش موجودة اقول لنفسى اكيد حيبص لها لانة بيحب الستات وحيتخيل نفسة معاها و ابدا اتنرفز و الدم يغلى فراسى و طبعا حتى لو هو ملوش ذنب لو ما ضربتش ببوزى قدامة الموضوع بياثر على علاقتى بية و يخلينى اعاملة بجفاف و شدة و نتخانق فى الاخر
 
لو خرج برة البيت افضل على نار اكيد مع واحدة اكيد نايم مع واحدة  لو جالة سفر تبع شغلة اكيد رايح يزنى ماهو كان بيعمل كدة زمان لما حاسة انى بجد حموت من التفكير و التخيلات الى بتيجى فى راسى
 
حتى جة على وقت اشك انة ممكن يفكر فى اختى او صحبتى
 لو جت مطربة ولا ممثلة فى اعلان نفس الحكاية لو قعد يذاكر او يعمل شغل عالكمبيوتر ابقى على اعصابى على اعصابى على اعصابى ونفسى اعرف بيعمل اية و افضل احوم حوالية ولو معرفتش استنى لما ينام او يخرج و اشوف هو كان داخل فين و طبعا دايما بيكون مظلوم
 
لو حكا لى عن حاجات بيسمعها يعنى مثلا صاحبة بيحكى لة ان فى واحد بيقعد فى كوفى شوب و يفتح البلوتوث وبيستقبل و يرسل افلام سكس انا ارد على جوزى اقولة اكيد شاب مش متجوز يقولى لا متجوز و مخلف انا على طول احط فبالى انة بيتكلم عن نفسة او على الاقل عن صاحبة ولو صاحبة كدة او حتى صاحب صاحبة كدة يبقى هو كدة لان الطيور على اشكالها تقع
 
كم مرة هو احتلم يعنى كل كام شهر كدة افضل استجوبة حلمت بمين و اتخيلت مين تقلب بخناقة لرب السما لانى بقولة الى بيحتلم العازب و بس و لو واحد متجوز احتلم بيكون لانة بيشوف او بيفكر فى حاجات وسخة
 
لو حلمت انة خانى اصحى متعكننة و اتعامل معاة على انة خانى فعلا مش فى الحلم و بس اول طلاق تم بينا لانة كان مخبى كليبات اغانى اجنبية منى و لما شفتها بهدلتة و قلت لة طلقنى راح مطلقنى فى وقتها و قال انة حس كانى امة بتحاسبة و دايما يقول  معاى ان الشباب بيعملوا بلاوى و حريمهم مش حاسين و هو مظلوم و على الرغم من كدة قارفاة وطبعا الكلام دة مش بيدخل راسى لان فى نظرى الرجالة كلهم ضعاف قدام الستات
 
والتانى برضوا حصل بينا جفاء لمدة 3 او 4 شهور و شك و قرف نفس الموال و حصل طلاق  و التالت كدة كمان لولا ساتر ربناو و ما اتحسبش طلقتين

حاليا احنا كان بينا مشاكل من شهرين و ضرب لان هو خلاص و صل لاخرة منى و دلوقتى عندنا ولد صغير عمرة شهور بس و هو قال انة مخلينى على ذمتة علشان ابننا بس لو ابننا كبر حا يسبنى غير هم الشك و الغيرة كمان عايشة مذبذبة و خايفة

انا عارفة انى مريضة بس هو ما عندوش استعداد يودينى دكتور نفسى لانة رافض الفكرة و مش مقتنع بيها و دايما يقولى مفيش حاجة اسمها طب نفسى ودول بيضحكوا عالناس خصوصا ان عندة امة بتتعالج نفسيا من سنين طويلة فهو اتعقد

وكام احب اضيف انى بحس ان ابويا مريض بالشك زيى طول عمرة يشك فيناو لما يجى اجازة يراقبنا و امى غيورة لابعد الحدود مع ان ابويا عرف ستات غيرها كتير و هى كانت بتسمع و تعرف و بتغير اوى علية هما حاليا منفصلين وكمان انا اتعرضت للتحرش الجنسى من استاذى و انا فى الابتدائى وانا فى الاعدادى

 كمان من استاذ تانىو من بنات الجيران و انا فى الابتدائى كمان و انا فى الثانوى اتعرضت للتحرش الجنسى فى المواصلات ومن اسباب تعقدى كمان و شكى فى جوزى انى على درجة قليلة من الجمال و هو وسيم و بيلفت النظر فى كل مكان حتى ساعات كنت اتكسف اخرج معاة احسن حد يبص علينا و يقارن بينا و يحرجنى  قدامة

 و كمان اهلة هو مشتتين امة انانية وبتحب مصلحتها و ابوة خمرجى و بتاع ستات وطول عمرة يخون امة و هما حاليا مطلقين و دة سبب بيخلينى اشك فية لانى بحسة شبة ابوة فى اشياء كتير وكمان جوزى بيغير عليا مش زيى بس برضوا بيغير يعنى ممنوع اطلع من البيت من غيرة رجلة على رجلى

 و طبعا محجبة و مغطية وشى لانى عايشة فى بلدة ودة سبب بياكد لى انة خاين لان الى بيخون بيخاف على اهل بيتة بزيادة واحب كمان اقول ان الناس الى اعرفهم كلهم بيقولوا علية خلوق و غير ما انا بفكر بس للاسف فكرة انة بيحب الستات او على الاقل بيفكر فيهم مش بتتشال من راسى
 
انا قلت لكم عن حالتى و اتمنى الاقى عندكم الحل لانى تعبت و الهى العظيم خلاص نفسى ابطل احس بالغيرة و الشك الى تعبونى و حايخربو لى بيتى وعارفة انى ظالماة وخايفة  عمايلى تخلية يخونى بجد لانة متحملنى من 7 سنين و قبلهم 3 خطوبة

 وحتى لو بيعرف حد  مع انى عارفة انة مجرد شك مرضى فى راسى انا عاوزة ارتاح من الاحساس المقرف بالشك و الغيرة لانى ظالماة و ظالمة روحى معاة ياريت تقولوا لى اذا حالتى ينفع لها حل بالكلام ولا العلاج الدوائى و ارحمونى من الى انا فية

مشاركة الاستشارة
يوليو 27, 2018, 03:13:01 مسائاً
الرد على الإستشارة:


أختي الفاضلة :

 سلام الله عليكم ورحمة الله وبركاته وبعد :

  - أقترح عليك أن تتوقفي عن الغيرة والشك فهما أقوى عوامل هدم الأسر .
 - أبعدي عن نفسك الأفكار السلبية والتشاؤمية وركزي على الإيجابية .
 - إصرارك على تخوينه قد يدفعه للبحث عن زوجة أخرى .
 - أكثري من الاستغفار والدعاء والصلاة وتجملي بالصبر ( واستعينوا بالصبر والصلاة وإنها لكبيرة إلا على الخاشعين)وأحسني الظن بزوجك فالحياة الزوجية تقوم على عنصر الثقة المتبادلة .
 - فكري في الحياة الزوجية السعيدة وكيف تحقيقينها مع زوجك وعليك بتحسين آلية التواصل والحوار.
 -تذكري معاناة الأخريات لتهون عليك معاناتك .
 - حددي مشكلاتك بدقة ومن ثم فكري بالإجراء المناسب لكل مشكلة وما الذي تستطيعين عمله وما الذي لتحتاجين فيه إلى مساعدة .

  كما أقترح عليك أن تتواصلي بالهاتف مع أحد الهواتف الاستشارية للمساعدة .

 - وقد تحتاجين إلى عرض مشكلتك على أخصائية نفسية أو مستشار نفسي أسري .

مقال المشرف

أطفالنا والرؤية

قرابة أربع عشرة سنة تمثل العمر الافتراضي المتبقي لتحقق جميع مؤشرات الرؤية الشاملة التي أطلقتها الممل...

شاركنا الرأي

ما مدى تأثير شبكات التواصل الاجتماعية على الأسرة

استطلاع رأي

ما رأيك في فترة الرد على الأستشارات حالياً ( خلال 5 - 7 أيام )؟

المراسلات