الشكل والثقة بالنفس .
33
الإستشارة:


انا شخص سنى 19 سنة...انا هحكي مشكلتى من اولها خالص ...انا و انا صغير كنت فى المدرسة متفوق جدا بس فى نفس الوقت كنت خجول..كان ليا اصحاب و اصدقاء والحمد لله  بس كنت دايما شايف نفسي انى خجول و كنت دايما بحس ان فى ناس فى سنى بس مش خجولين اوي زيي كدا و كان نفسي ابقى زيهم..كبرت شوية دخلت تانية ثانوي ملامح شكلى اتغيرت و بقيت رفيع اوي و ووشي رفيع و مناخيري كبيرة و اسمر كان شكلى وحش من الاخر ...شكلى دا سببلى عقدة نقص جامده جدا..كان اي حد شكله حلو اشوفه قدامه احس دايما انى اقل منو ..و العكس مع الى شكلهم اوحش مني كنت دايما احس معاهم انى مرتاح و انى اعلى منهم و انهم بيبصولى على انى اعلى منهم فى الشكل..دخلت الكلية و فضلت ع الوضع دا و كنت دايما ما بحبش اروح فى حته بعد الفترة الدراسية و ما بقبقاش مرتاح مع صحابي و حاسس انى مخنوق كدا معاهم و اقل كلمة ممكن تضايقنى و بحس انى مش عارف اتكلم و ساعات بلاقى نفسي بقول اي كلام و كلام مدعاة للسخريةو كنت بحس انى غبي جدا..كنت حاسس نفسي انى ماحدش بيحبنى خالص اصلا و دايما بحس بالنقص و  انى قليل اوي و بضايق اوي اما حد يجيب سيرة شكلى بهزار مثلا و كدا ...قررت فى فترة من الفترات انى اكل كويس و احاول اتخن و بالفعل نجحت فى كدا و بقا شكلى معقول شوية بالرغم انى ما زلت قصير و طولى 168 سنتى بس ...بعد كدا بقا فى تانية كلية كان فى شهر رمضان ابتديت ادعي ربنا انه يخلصنى من الى انا فيه دا..ربنا استجاب لدعائي الحمد لله و لقيت نفسي مرة واحدة كدا بقيت عارف اتكلم معرفش ازاي و بقيت لبق فى الكلام و دمي بقا خفيف جدا..قولت لنفسي يمكن الحاجات دي كانت عندي اصلا من الاول  و كانت مستخبية عشان كنت معقد من شكلى...حسيت ان عقدتى خلصت و انى ممكن اتعايش بشكلى دا و كنت واثق جدا من نفسي فى الفترة دي و حسيت انى احسن من ناس كتير حتى الى كان شكلهم حلو و الى كنت بحس معاهم بالنقص كنت بقعد معاهم عادي جدا و اتكلم و اهزر و حسيت ان الناس بتحبنى جدا و حسيت خلاص ان الحياة بقت بمبي و بتاع ..جيت فى مرة كدا و انا فى الكليه حصل موقف حسسنى انى غبي تاني ...لقيت نفسى برجع للعقدة الاولانية تاني بعد ما افتكرت انها خلصت و لقيت نفسي بقول لنفسي افرض كل الى فات دا كان وهم و انك لسه فعلا معقد و الافكار السلبية قعدت تسيطر عليا..جيت بعد كدا فى فترة نسيت شوية الى حصل و حصل شوية حاجات كويسة يعني نستنى برضو لقيت نفسي واثق من نفسي تاني !!! و حاسس انى اقدر اعمل اي حاجه و لقيت نفسي شخصية تانية تماما و مرح و بحب الدونيا و بحب اقعد مع صحابي و حسيت انهم بيحبوني و كدا ...جه حصل موقف سلبي برضو بعد كدا حسسنى انى مش خفيف الدم زي ما كنت متصور ..رجعت معقد تاني ...و هكذا من ساعتها لحد دلوقتى ساعات ابقى واثق من نفسي و ساعات ما ابقاش واثق من نفسي ..مع انى حاسس انى ذكي و دمي خفيف فعلا و دا على ما اعتقد بيعوض عقدة النقص فى شكلى - الى بالرغم انه بقى حلو دلوقتى و فى ناس كتير بتقول انى بقيت حلو بس مش كل الناس يعني - بالرغم من كدا بحس برضو انى وحش و عندي لحد دلوقتى مشاكل اما اجي اتكلم مع بنت بحس انها بتبص على شكلى و بتحتقره و كدا بالرغم ان فى قالولى من البنات الى اعرفهم شكلك حلو بس فى برضو ناس تانية قالتلى قبل كدا شكلك مش حلو كهزار يعني بس المشكله انى مش ببص الى قالو حلو ببص الى قالو وحش بس عشان شايف نفسي وحش ....المشكله انى ساعات ببقى واثق جدا من نفسي بس مرة واحدة بحس انى مش واثق و بسيب الافكار السلبية تخش مخي تاني..ببقى قاعد مع ناس صحابي مثلا و قاعدين بنضحك و بنهرج و انا بضحكهم و بحس انى دمي خفيف و مرة واحدة الاقى نفسي و انا قاعد بقول لنفسي افرض كل دا وهم  ؟ افرض بيضحكو عشان يرضوك و ما يكسفوكش ؟ و بعدين هو عشان ضحكتهم يبقى خلاص بقيت اجتماعي و الناس بتحبك ؟ طب افرض مش بيحبوك اصلا ومصاحبينك كدا و خلاص .. و هكذا بقا ...المشكله بجد انى شايف نفسي فعلا عندي صفات حلوة جدا و صفات اعتقد انها لو عند اي حد تاني هتبقى كافية جدا انها تخلى الشخص دا اجتماعي جدا ...بس المشكله انى بالرغم انى عارف كدا برضو مش متاكد و لسة عندي شك فى نفسي ..و اي موقف مهما كان ما اعرفش اتعامل معاه كويس مهما كان ..بحس انى رجعت للعقدة تاني ..بقول لنفسي اي حد معرض انه يفشل فى معالجة المواقف و الناس مش معصومه من الخطا و اي حد بيغلط ...بس برضو مفيش فايده مش مقتنع ...بحس انه كلام بيتقال و خلاص عشان اخفف عن نفسي و انه فى الواقع مش صح ..لدرجة انى بقيت لما اتفرج على فيلم مع واحد صحبي و الاقيه عرف جزء فى الفيلم و انا ما عرفتوش قبليه بحس انى غبي و انى مش فاهم اي حاجه و انه اذكي مني و برجع للعقدة تاني ....


ارجوكم ساعدووني  ؟؟

مشاركة الاستشارة
يوليو 27, 2018, 03:13:01 مسائاً
الرد على الإستشارة:


الأخ العزيز صلاح :

هذه الأفكار التي تحاصرك من الأمور المألوفة في مرحلة المراهقة والحمد لله أنك خرجت منها بسلام والمهم أنك تتجاوز مثل هذه السخافات لما تملكه من قدرات هائلة مكنونة وراء انشغالك بصورة جسمك وشكلك .

 والمهم أن تعرف أن الشكل أحد العناصر التي تميز إنسانا عن غيره وتجعله مقبولا اجتماعيا  ولكن الأهم هو السلوك وأسلوبك في التعامل مع الناس فأنت تضع الناس في اعتبارك أكثر من اللازم في الحكم على المظهر .

 والمهم هنا هو جوهرك ونواياك الطيبة تجاه الآخرين وطالما أنت قادر على الحب والعطاء فلسوف تشعر بالرضا والسعادة عن كل الأشياء التي لا تستطيع تغييرها ومنها نوع الفرد وشكله ونسبه وطوله وما إلى ذلك فانظر في الأمور الجوهرية ولسوف تكتشف جوهرة روحك الطيبة وساعد الناس بقدر ما تستطيع وخالقهم بالخلق الحسن وأسلوب جميل وعندها ستكتشف جمال الإنسان فيك وتسعد في الدنيا والآخرة.

مقال المشرف

أطفالنا والرؤية

قرابة أربع عشرة سنة تمثل العمر الافتراضي المتبقي لتحقق جميع مؤشرات الرؤية الشاملة التي أطلقتها الممل...

شاركنا الرأي

ما مدى تأثير شبكات التواصل الاجتماعية على الأسرة

استطلاع رأي

ما رأيك في فترة الرد على الأستشارات حالياً ( خلال 5 - 7 أيام )؟

المراسلات