الإستشارة:
بسم الله الرحمن الرحيم
انا بنت في العشرين من عمري اتخطبت لواحد يكبرني ب23 سنة انا وهوة كنا بنشتغل في نفس الشركة وحبيتو قوي لكن المشكلة انو كان لما بسألوا عن مشاعرو ناحيتي كان دايما يقول انو اعجب بيا من اول يوم شافني فيه ومشاعرو ناحيتي كبيرة قوي لكن ما بيحبنيش وبيتحجج ان الحب دا بيختلف مفهومه من واحد لواحد وحكالي حجات كتيرة قوي عنو محدش يعرفها غير المقربين قوي منو وانا مع انه كان خاطب ناس كتير قبل كدة ومحكالهمش حاجة خالص وحكالي انه زمان وهوة في العشرينات حب واحدة حب بجنون وخطبها ولما سابته رغم كل اللي هوة عملهولها كان لما يخرج الشارع يشوف أي واحدة يفتكرها هيا وبيقول انه من يومها محبش حد وان حبيبته هيا مراته
وبعد فترة حسيت انه بدأ يحبني قوي قوي وان أنا عنده الأولوية الأولى وكان لما اجي اتصل عليه يقفل عليا وهوة اللي يتصل ولما يروح أي مكان في مصر يتصل عليا وفي يوم جت له سفرية تبع الشركة كان بيودعني والدموع في عنيه وانا كمان كان الموضوع ده صعب عليا وقالي انه هيكلمني اول ما يوصل وانه هيكلمني علاطول من هناك ولما سافر ما اتصلش بيا خالص وبعتلي بعد فترة طويلة ايميل يقولي انه كويس ويوم ما جه من السفر ما اتصلش بيا وأنا اللي اتصلت بيه وكلمني لما وصل بيته وبعدها ما كنش بيكلمني وانا بكلمو وكان يقولي هكلمك واقعد استنى وميتصلش لا عالبيت ولا الموبايل
وفجأة قبل ما يسافر بيوم كلمني كتير ولما سافر الصبح ما اتصلش زي ما عمل قبل كدة وانا اللي كلمته وبردو مكلمنيش من هناك بس لما كنت ابعتله ايميل يرد عليا علاطول وكان واعدني هيجيلي بعد اسبوعين مجاش وجه لما خلص المهمة ولما جه حكالي على مشكلة كبيرة بتواجهه وقعد يقولي اني ملاك ومحصلتش وفجأة قطع معايا لما باجي اكلمه ميردش عليا وبعد كتير قوي يرد ويقولي اصله تعبان من المشكلة جامد ومش عايز يكام حد ويتصل تاني يوم عالبيت ويعتذرلي ووصل انه يقولي كلام قاسي اني ابعد عنه ومليش دعوه بيه وميردش عليا وفجأة يتصل تاني يعتذر وبعدها بردوا لما اجي اقف جمبو في المشكلة واكلمه ميردش عليا لا على بيته ولا على الموبايل بتاعه مع اني شفته كتير لما حد بيجي يكلمه على الموبايل يرد عليه ويقفل عليه ويتصل هوة على حسابه بيه زي مكان بيعمل معايا في الأول كأنه بقى بيستخسر يغرم عليا قرش واحد
أنا بقالي فترة مبكلموش وهوة مبيسألش أنا عايزة أعرف هوة مريض نفسيا ولا عايز يسيبني ولا ايه ارجوكم ردوا عليا بسرعة عشان أعرف مصير خطوبتنا ايه ولو بتنصحوني اني أكمل معاه قولولي اتعامل معاه ازاي
ولكم خالص التحية
