أهلي يتفننون في كبتي وتحطيمي !
25
الإستشارة:


السلام عليكم ورحمة الله وبركاته
مشكلتي ان اهلي لا يراعون الحالة النفسية ودايما وهم في ذم مستمر لي وتحطيم ابوي امي اخواني اختي محد يشجعني على اي شئ ابي اسويه و مو بس هم حتى باقي هلي تصير لي مواقف معاهم تجرح مشاعري بصراحه مو عارفه ارتب الرسالة  راح اكتب اللي بقلبي  والله يعينكم على الفهم

يعني مره كانت  زوجت خالي تسولف  وانا وبنتها قاعدين بعيد ما  فقلت لبنت خالي خلينا نقرب ونسمع  السوالف فلما قربنا سكتت  زوجت خالي وطالعتني بنظرة وصخه انحرجت انا من اللي كانوا قاعدين الين اليوم واناافكر اشلون انتقم منهاوهذه سالفة ثانية وكان عمري تقريبا13 وكنت اسولف مع امي وفجاة امي التفت علي وقالت لي انتي منافقة ولاادري ليش يعني انا ايش قلت واليوم قبل لا اكتب لكم هذه الرسالة كنا قاعدين نتغدى انا وامي واخوي وكانوا يسولفون عن دروس التصميم اللي اخذها اخوي واختي فقلت لامي يعني اخواني كلهم اخذوا دروس وانا لا قام اخوي قال انا اكره اللي يتكلمون بالطريقة هذه وردت امي عليه اختك هذه حسوده حسوده وعادتها كذا مره  والله  انا اشوف نفسي طيبه ولا اتمنى لاحد الشر ليش امي تقول هالكلام عني اذا امي  ما تعرف حقيقتي ولاتعرف شخصيتي هذه واهي امي عيل باقي الناس ايش يظنون فيني؟

وغير هذا قلت اني ابي انزل وزني لانه  يزيد كل شهر فقلت لامي اشترك في مركز يسوي اكل صحي  وهالمركز  شغلته يقيس وزنك ويقولك كم كيلو لازم تنقص ويرسلونك للبيت الاكل اللي تحتاجه لتخفيف وزنك لكن امي طبعا وكالعاده  قالت لي انتي ما راح تمشين على النظام الغذائي وراح تاكلين من اكلنا يعني تحطييييم واذكر السنة اللي طافت امي كانت تقول لنا انتوا مرضتوني صرت اخذ حبوب مهدئة وانتوا السبب وهالشئ اثر فيني وايد ويخليني احس بالذنب  ومع هذا اتمنى اسوي اي نشاط مع امي وابوي لكن امي دايما  ساحبه نفسها برا السالفة ولا تسوي اي شئ  وابوي دايما مع اصدقائه يعني ما يقصرون بالفلوس والملابس والاكل لكن  هذه الاشياء ما تسعدني سعادة كاملهاحب اكون مع امي وابوي ونطلع ونستانس ونضحك لكن امي وابوي دايما صراخ وصراخ وامي تقول هذا ابوكم هو السبب ما يعرف شئ وابوي يقول هذه امكم ما تعرف شئ وكل واحد يلوم الثاني يعني لو قعدنا مع بعض نبدا صراخ

زهقت انا من هالشئ لدرجة اني صرت اصارخ فيهم انتوا كل تتهاوشون وكل نكد ونكد ايش هذا ما تعرفون تسون شئ بهدوء نستانس شوي يردون علي لا احنا بس نتناقش وهذا اسلوبنا نجي حق اخواني اخوي الكبير كل ما ابي اسوي شئ ينتقدني ويحطمني يعني الحين قلت لامي ابي اركب تقويم اعدل اسناني وسالت الدكتورة وقالت لي اني محتاجه تقويم اخوي لما عرف  قام علي وليش تركبين تقويم  وعلشان شنو انتي تدلعين وامي وابوي يسمعونه وساكتين والااختي صرت اكره اروووح اي مكان معاها كل تقعد تعلق علي مثلا ايش هالمشيهوالا لما فلانه قالت كذا  ليش قلتيها  كذا والا اذا رويتها قميص او بدله واقولها ايش رايج تقولي سخيفة وحتى لما اسوي شئ  او اجيب شئ تقعد تعلق والا تشتم يعني دايما يحسسوني اني  ماشيه غلط واني انسانة سخيفة غبية ولا افهم ومتخلفة وغيرها

الحين انا دايما بروحي وحيدة في البيت ابوي يطلع وامي تنشغل بالمطبخ اختي قدام التلفزيون اخواين برا البيت ما عندي احد اسولف معاه صرت اقعد عالنت بالساعات من اول ما ارجع من الجامعة الين اروح انام بس طبعا اصلي وفي الجامعة امشي بروحي اكل بروحي اقعد بروحي اسولف مع نفسي لدرجة اني صرت اتخيل مواقف اقعد اضحك عليها زي المجانين او اقعد افكر بذكريات طفولتي يوم اني كنت فعلا سعيدة مب الحين

فقلت بدال لا اصير مريضة واستجن ليش ما اشغل نفسي بشئ واضيع الوقت وانسى الناس يعني اخلق لي عالم  لي بروحي فشريت لي كاميرا قبل لا اشتريها طبعا ابوي هو اللي يوديني قعد يقنعني ما اشتريها وليش بتشترينها الكاميرا غالية وبتضيعين فلوسج وما يستاهل وبدال  لا تركزين بدراستج وبعد ما شريتها  صار يناديني بالمصورة الصحفية يعني لما يشوفني ها يا مصورة شنو صورتي والا امي راحت ققالت لاخوي وقام اخوي يستجوب شنو ناويه تصورين وانتي بس اصرفي فلوسج زين ارميهم بالشارع يعني انا مو فاهمة ليش الاسلوب هذا وياي وليش ينهروني طيب عطوني شئ  انتو تحبونه اسويه وراح اسويه بس لا تحطموني وتحسسوني اني ما عندي عقل والله اني طفشت صرت افكر ليش  ما اموت وافتك من القهر اللي كل يوم يزيد  ماادري ايش اسوي حتى الزواج مافي الين اخلص جامعة بعد 6 سنين ماادري اشلون اتخلص منهم وارتاح اهرب من البيت وين بروح لو هربت واذا اهلي اصلا مو حاطين لي قيمة ويعاملوني معاملةزفته الغرب راح يحترموني .

نفسيتي احس انها من سيئ الى اسوا  كل يوم كرهي لنفسي يزيد وحتى ثقة في نفسي ماعندي كل ما تكلمت افكر في الكلام اللي قلته واتحسف اني قلته وفي الايام الماضية صرت احبس نفسي في غرفتي  ما اشوف احد ولا اطلع وحتى  التلفون ما ابي ارفعه اخليه يرن الين يسكت وواقعد في غرفتي اصيح واطق نفسي وقبل فترة من كثر ما انا مقهورة جبت مقص وقصيت شعري كل حياتي تجيب لي الهم والقهر ما عندي احد يسمعني يقولي كلام طيب  يطمني يطبطب علي يعني امي اقولها يمه ابي انام بحضنج تقولي كيفج ماادري انا عاله عليهم حتى من كلامهم ومعاملتهم كلهم اقتنعت اني ما انفع زوجة ولا ام  والضحك من زمان ما ضحكت من فترة قعدت مع وحده اعرفها في الجامعة نسولف فالبنت قالت شئ يضحك فضحكت وفجاة بدت عيوني تدمع وانقلب الضحك صياح ما فهمت ايش اللي صار من بعدها يعني قل احتكاكي مع الناس اكثر من قبل بس اتمنى ان يكون في لي علاج والا حل
وشكرا

مشاركة الاستشارة
يوليو 27, 2018, 03:13:01 مسائاً
الرد على الإستشارة:


منار :

السلام عليكم ورحمة الله وبركاته وبعد.

قرأت رسالتك باهتمام وتقدير لكل حرف كتبته ببساطة وتلقائية فقد عبرت عن نفسك وعن همومك ومشاكلك وأفكارك بحرية وطلاقة , أدرك مقدار افتقادك لمن ينصت لك بحب واهتمام ويقدر مشاعرك وأفكارك كما هي لذلك فقد أردت أن أخبرك بشيء هام وهو :

1-أنك الآن في مرحلة عمرية هامة جدا جدا تحتاجين فيها لمزيد من الإحساس بالأمان والثقة في تعامل من حولك.

2- أنك في مرحلة تكون شخصيتك الحقيقية التي ستؤدينها في مستقبلك القريب بعد زواجك واستقلالك.

3- أن طبيعة الأسرة العربية في أساليب تربيتها تعتمد على مصادرة الرأي والاعتمادية وليس على حرية التعبير والاستقلال.

4- دائما الأسرة لا تتقبل بسهولة فكرة انتقال أحد أفرادها من مرحلة الطفولة إلى مرحلة الشباب لذلك تظل فترة طويلة تعامله على أنه مازال طفلا بغير رأي أو اهتمام أو خصوصية وهذه مسألة وقتية بل وهذه هي جوهر مشكلتك.

5- اجعلي سلوكك وتصرفاتك تبدو كالكبار فهذا سيسهل فكرة قبولهم بانتقالك إلى مرحلة الرشد وإبداء الرأي.

6- اشغلي نفسك ونوعي وعددي اهتماماتك لكي لا تنشغلي بأسرتك عن نفسك.اخلقي لنفسك شخصية وارسمي أنت حدودها مع الآخرين .

سيدتي : أنت الآن في أهم مرحلة في حياتك فلا تهربي من نفسك وواجهي مشاكلك وتجاوزيها باقتدار . تحياتي وتقديري .

مقال المشرف

في بيتي مدمن جوال

يا الله.. ما هذا الذي حال بين الابن وأبيه، والزوج وزوجه، والحبيب وحبيبه!! غرّبَ الإنسان في بيته؛ حتى...

شاركنا الرأي

هل «الوتساب» جعل أطفالنا أيتاماً؟

استطلاع رأي

رأيك يهمنا: ما رأيك في منصة المستشار الأستشارية؟

المراسلات