أحب أهلي ولكنهم أتعبوني .

أحب أهلي ولكنهم أتعبوني .

  • 25079
  • 2011-09-06
  • 7389
  • ام محمد


  • السلام عليكم ورحمة الله وبركاته
    انا متزوجه من سنتين والحمدلله زوجي يحبني ويحترمني ومحافظ جدا على الصلاه وعلى مبادئه وعندي ولدي الله يحفظه عمره 7شهور

    المشكله مو في زوجي بالعكس زوجي دائما يساعدني على بر امي وابوي لكن ما يتحمل تصرفاتهم لانهما من النوع الي منفتحين وزوجي لا يعني يرفض لبس العبايه المخصره والملونه وكشف الوجه في اماكن عامه

    واهلي اعندهم التصرفات هذي وانا بصراحه اخجل لما زوجي يشوف اهلي كذا واحيانا ارفض نجتمع مع بعض عشان زوجي لا يشوف هذي الاشياء من اهلي لكن الله يهديهم

    والوالد طيب جدا وحنون لكن يتبع امي في كل شي ويخاف منها وامي من النوع القويه ودائما تفكيرها غريب وتحب اللي تقوله يمشي ودائما هي المسيطره في كل شي صغير او كبير

    وكل ما اروح لهم لازم اسمع كم كلمه خصوصا امي وكم مره عشان مامشيت على كلامها وزعلانه من نفسها قالت لي اقعدي في بيتك لا اشوفك تجيني وطردتني مره وانا حامل ومره قبل 3اشهر

    وفي غيابي يوصلني من اختي كلام امي دائما تحلف تقول اني مو مرتاحه مع زوجي يعني تحاول تخلي زوجي بصوره مو حلوه دائما وتسب فيه وابويا يقول بيرميها يوم على انو بالعكس زوجي ماعمره شافو منه الا كل خير بس عشان مايتبع امي

    ولما كنت حامل قالي زوجي خلينا نروح عند اهلك عشان ترتاحي ويكونو جنبك لكن امي كل يوم هيا في زواج او مسافره او عند صحباتها والمشكله انا ما اقول لزوجي لكن زوجي يشوف بنفسه

    ويوم ولادتي شايفتني وانا تعبانه وبروح المستشفى وهيا تجهز عشان تروح فرح ولما رحت المستشفى وانا قلبي يحترق انو امي مو معايا لكن زوجي هو الدنيا كلها بعيوني لما وصلها خبر اني اولد جات الساعه 4الفجر وانا في المستشفى من الساعه 11

    وزوجي عارف قبل ما ادخل غرفة الولاده انو قلبي يحترق انو امي مو حاسه فيا ولاهي معايا لما جات رفض انها تدخل عندي غرفة الولاده لانو خايف اني اتوتر وازعل وخصوصا ان الضغط عندي عالي

    بعد ماولدت في الليل كانت في فرح قالت امي انا بروح اسلم وابارك وما بتاخر وزوجي هو اللي رافق معايافي المستشفى وبعد ماخرجت من المستشفى اتنفست عند اهلي ولاحد مهتم ولا احد سائل فيا ابدا

    حتى اكلي كان ابويا يجيبه ليا بعد اسبوع من نفاسي قالي زوجي قومي بنروح البيت لانو شايف اني دائما تعبانه ولا احد جنبي واتصل زوجي على ابويا واستاذنه وقال احنا راجعين البيت

    طبعا ابويا قال ليش وبدري قال زوجي لما تبغانا ابشر نجيك المهم رحت البيت وطبعا كملت نفاسي بتعب وقهر وخصوصا زوجي عنده دوام وانا كنت مره تعبانه وطفل صغير وخوف عليه يعني حالتي حاله مع كدا

    اهلي لايدقو ولا يسألوا وعتبانين ليش رحت طبعا اختي هيا الوحيده اللي متواصله معايا وقتها مع العلم اني كل يوم اتصل على ابويا وامي ولا يردوا ولا شي وكنت ارسلهم صور ولدي عشان احننهم

    مرت الايام وبعد ماصار عمر ولدي شهر ونص حنو وكلموني ورحت لهم مرت الايام وكل ماتزعل امي او تقول شي ابويا يطبق بدون تفكير ورجع الغلط لياطبعا الوقت هذا كله زوجي طفش منهم وقرف وقالي اعطيهم حق الله ورجعت الصله

    واول يوم العيد رحنا الصباح عند ام زوجي والساعه 10رحت الاهلي فطرنا عندهم وعزمونا على العشاء وبعد الفطور رجعنا بيتي ونمنا وفي الليل رحنا لاهلي واتعشينا وانبسطنا وبعد ماراح الناس جلست انا وامي وزوجي وابويا جلسنا شويه

    بعدين قال زوجي انا رايح البيت وبعد صلاة الفجر امرك عشان تجلسي مع اخواتك وتنبسطي قلت طيب طبعا في وحده من اخواتي مكتوب كتابها واهل خطيبها في مكه واحنا نازلين مع اهلي 2يوم العيد جده

    قالت امي اهل خطيب اختك عازمينا وبنروح تعالوا معانا انت وزوجك انا قلت زوجي مارح يرضى انو نروح مكه.. وخصوصا انو زوجي يقول عيب العروس تدخل بيت اهل خطيبها وهي مخطوبه وومستحيل يوافق انو يروح بالطريقه هذي

    وخصوصا اهلي كل بعد فتره يسبون ويلعنون وتصير مشاكل مع خطيب اختي وزوجي يسمع هدا كله ويقول بعد ما اختك تتزوج من عيوني اوديكي عندها او عند اهل زوجها

    المهم امي قامت زعلت وقالت انت مافيك خير واصلا انت بعالم ثاني حتى صحباتي يقولون بنتك بعالم ثاني يعني دخلت المواضيع ببعضها

    انا سكت وطنشت وبعدها طلعت غرفتها وتركتني لوحدي واخواتي كل وحده بغرفتها انا دقيت على زوجي وقلت تعال وبعد 10دقايق نزلت امي واختي وكاني ماني موجوده وقعدوا يتكلمون وغيروا الموضوع

    وبعد نص ساعه دق زوجي قال انا برا اطلعي لي سلمت عليهم وخلاص على اتفاقنا على جده وخرجت وثاني يوم بنطلع جده ندق على ابويا وامي مطنشين ولا يردون المهم طلعت جده وغيرنا جو انا وزوجي

    على انو كنا على اساس نطلع مع بعض ونقابل خالاتي لكن اهلي مطنشينا ولا يردو علينا وقابلت خالاتي وجلست معاهم نص ساعه ورحت ثاني يوم سافرنا رجعنا المدينه

    والمشكله انو امي تسوي انها زعلانه ولاترد وابويا زيها وزوجي خلاص تعب منهم وقال الا الكرامه وانهم يعاملوكي كانك غريبه مو بنتهم يعني والله العظيم تعبت من تصرفاتهم وافعالهم وما ادري ايش اسوي معاهم

    يعني ادق عليهم ولا يردون ولا شي واليوم دقيت وردت امي بعد عشر اتصالات وتكلمني بدون نفس وكلمه ورد غطاها وزوجي رافض المبدأ هذا يقول بكره يدعسو عليك وعلى ولدي وانا اتفرج

    يعني يانكون على كيفهم يا يزعلو والله تعبت والمشكله فيهم كبرياء وحتى اذا غلطوا ما يقولون انو غلطنا لا يسو انهم زعلانين وبنفس الوقت يبفو كل شي على كيفهم وانا ما ابغى الشي هذا

    والمشكله ابويا معاها في كل شي وأنا بصراحه تعبت منهم وعلى بالهم انو لازم اتبعهم واطنش زوجي او استقوي عليه عشان يرتاحو وانا ما ابغى اخرب بيتي بنفسي وبحافظ على رجولة زوجي ومبدئه لاني احبه واحترمه

    واهلي احبهم بس تعبت منهم ومن تعاملهما يعاملوني كاني غريبه...انصحوني ودلوني ايش اسوي وهل انا على خطاء بشي؟؟؟

    • مقال المشرف

    إذا ارتاح الوالد.. تعب الولد

    "إذا ارتاح الوالد تعب الولد، وإذا تعب الوالد ارتاح الولد"، سمعت هذه العبارة من بعض كبار السن كثيرًا، وقد تجد أحدهم يبني عليها مواقف حياتية كبرى، بل يحكيها ب

      استطلاع الرأي

    هل تؤيد فعالية الأستشارة الاليكترونية في حل المشكلات؟
  • نعم
  • أحياناً
  • لا
    • المراسلات