هل أنهي خطوبة الإهانة ؟

هل أنهي خطوبة الإهانة ؟

  • 11845
  • 2009-01-04
  • 2388
  • أمة


  • السلام عليكم ورحمة الله وبركاته
    أنا مش عارفه أبدأ منين بس أنا فعلا معتبراكم أخواتي الكبار ويارب إن شاء الله ألاقي عندكم النصيحة وإنتم أهل ذلك في البدايه أنا يعني إلى حد ما كنت عارفه طريق ربنا وصحبتي كانت صالحة وكان يعرف عني الصلاح بفضل الله وكنت متحمسه جدا لديني وإسلامي وبأحاول أصلح دوما في نفسي ومجتمعي

    ولما كان عندي حوالي عشرين سنه " يعني من سنه ونصف بالضبط"اتقدملي بن عمي واتخطبتله وكنت طبعا بأدور على الإنسان الملتزم إللي يعيني على طاعة ربنا وهو كان أزهري ويعني إلى حد ما منتظر منه الصلاح وفعلا شجعته والتحى وكنا على أبواب رمضان وشجعنا بعض ويمكن بفضل ربنا في الأول وفي الآخر كنت بأساعده وبآخد بإييده للعباده

    لدرجة إن أصحابه وأهله كلهم لاحظوا وقالوله إنك في صحوة دينيه وهكذا المهم الوضع ده لم يستمر كثيرا ففي البدايه هو قالي أنا شاب ولازم نقرب من بعض أكتر فقربنا وبدأت أكلمه في التليفون وبدأ ممكن يستخدم كلمات الحب الصريحه وكنت برضه محافظة على نفسي شويه

    لكن بالطبع ده مش كان عاجبه لإنه عاوز يحس من ناحيتي بإستجابه فصمدت الحمد لله شويه وبعدين لا تراجعت لإني كنت أصلا بأحس إتجاهه بمشاعر جميله وده من الأول خالص بس كانت في البدايه مشاعر طاهرة
    المهم هو بقى كشخصيه اتغير كتير أو يمكن كان فيه عيوب بس كنت قادرة أستحملها لكنها زادت جدا وبقيت فوق المحتمل

    زي مثلا عصبيته المفرطه لدرجه إنه بيغلط فيا ويقول ألفاظ صعبه وممكن يغلط في والدتي ودايما يغلط في أخويا لكن مش في وشه مش حأقول حساس لكنه شخصيه بيتلكك على الغلط وبيحاول يحول كل شئ لغلط
    من ناحيتي أو من ناحية إللي قدامه هو طبيب في فترة الإمتياز ووضع أسرته المادي أقرب لخط الفقر

    بس أنا والدي وكلنا مش كان فارق معانا عشان عاوزينه يعتمد على نفسه ده غير إن مستقبله بمقاييس البشر كويس لكن زملائه كلهم إللي خاطب وإللي مش خاطب بيشتغلوا لكن ده حتى الآن وبعد مرور أكتر من سنه ونصف ما حوشي ولا قرش والله لجواز ولا غيره بل بالعكس كمان مداين ويمكن أول واحدة مداين لها هي أمي

    كل الحاجات دي كانت فيه وكنت بأحاول أكيف نفسي عليها وإن كانت كانت بتألمني لإني زي أي بنت بأحب الكلمة الطيبه والمعامله الكويسه لكن والدته حتى عمرها ما كانت ترفع سماعة التليفون تسأل عليها ومش بأشوفهم غير في العيد ويوم نجاحي وكتر خيرهم أوي لحد كده

    لكن الأصعب من كل ده وده إللي عاملي مشكله دلوقتي إنه طلع شاب غير صالح مع العلم إنه عارف الصح فين وإللي يرضي ربنا فين لكن مش بيعمله يعني نادرا ما يصلي الفجر بيجمع صلوات كتيرة والمشكله إنه بيجيب أحكام فقهيه غريبه ويقول أنا سمعت بيها من حد صاحبي

    الأخطر من كده وهنا حتيجي غلطتي إنه هو حاب يقرب مني جسديا بدايه من مسك الإيد لفوق وطبعا أنا في الأول كنت قويه وصامده فعلا لكن للأسف لم أصمد للآخر فقدر فعلا يعمل معايا حاجات كتير من إللي هو عاوزها وأوقات كتير كنت بأقوم وأتوب وأوقف وأتحايل لكن هو كان بيعذبني بسوء المعامله

    ولما لقيت إني صعب أوقفه وخفت على ديني لإني علاقتي بربنا طبعا اتأثرت حتى لو طول اليوم في المقرأه لكن خلاص سقطت في نظر نفسي وهنت على الشيطان
    أنا بقالي حوالي ست شهور نفسي أوقف الموضوع وخصوصا من كام يوم كمان اكتشفت إنه بيكلك بنات للدردشه والتعارف والتسليه

    وقالي ده عيب فيا وأنا صارحتك أهوه واستحمليني بيه
    لكن عندي كذا مشكله أولا أمي خايفه عليا من العنوسه وفرحانه إنه هو دكتور مع إن الدكتور ده مش مشجاعني خالص على التفوق العلمي وواقف في طريقي وأنا بأحضر الماستر وأمي فعلا عاملاها محزنه

    الحاجه التانيه إني خايفه إن إذا ربنا كرمني وارتبطت بحد تاني وأنا عملت معاصي مع الشخص ده حأحس كده إني خاينه للإنسان إللي ربنا يكرمني بيه
    فيه كمان حاجه إنه هو بن عمي ووالده ووالدته حيعملوا مشاكل كتير وخصوصا إنهم شخصيات صعبه أوي

    أنا زهقانه ويمكن كمان مش عارفه أعبرلكم بالكلمات عن كم الهم إللي أنا فيه ولا عارفه أصيغ المشكله فين
    بس أنا عاوزة أرجع لربنا تاني وأمشي في الطريق الصح تاني وكفياني ذل وإهانه من الشخص ده

    ساعدوني بالله عليكم وردوا عليا لإن والدي مسافر وإحنا حنكلمه النهارده وعاوزة أقوله إني أنهي الموضوع ده

  • رد المستشار

    يمكنك التعرف على السيرة الذاتية للمستشار وإستشاراتة السابقة بالضغط على أسم المستشار

  • 2009-01-20

    د. حنان قرقوتي


    بسم الله الرحمن الرحيم ‏.

    ابنتي:‏

    السلام عليك ورحمة الله وبركاته، وبعد :

    لقد قرأت شكواك وما تتخبطين فيه من وضع بسبب خطبتك من ابن عمك الدكتور وخريج الأزهر ‏الشريف.‏
    وتكمن مشكلتك في :‏

    ‏1- أنك لست مرتاحة مع خطيبك.‏
    ‏2- الخوف من العنوسة إن تركت الخطبة.‏
    ‏3- الخوف من الارتباط بآخر وأنك قد تجاوبت مع خطيبك إلى حد لم ترضين فيها عن نفسك.‏

    ابنتي:‏ هناك عدة نقاط يجب أن تعلميها بالنسبة لمشكلتك تتجلى في التالي:‏

    ‏1-‏بالنسبة لاتخاذ قرار بشأن الاستمرار في الخطبة أو تركها فلا أحد يستطيع ذلك إلا أنت ‏وبمساندة أهلك ولا تنغرِّي بمنصب دكتور أو غيره إن كان لا يناسبك، علماً أنه لا ‏يحترمك كما تقولين ولا يحترم أهلك. ولكن قبل اتخاذ أي قرار من هذا النوع أنصح ‏بعمل استخارة لله تعالى وهي عبارة عن ركعتين لله تعالى وبعدها تدعين الله سبحانه ‏وتعالى أن يشرح صدرك لما فيه الخير وهو سيتولى أمرك.‏
    ‏2-‏في حال قررت التراجع عن الخطبة فلا تخشين من العنوسة لأنك يا ابنتي لا زلت في عمر ‏الزهور، ونسبة سن الزواج قد ارتفعت في هذه الأيام وفي أغلب البلدان تقريباً، وربما ‏تقدم لخطبتك شخص لم تتوافر فيه المواصفات الحسنة التي توجد في خطيبك كمنصب ‏دكتور مثلاً، فالرجاء عدم مقارنة شخص بآخر ولو في خيالك لأن هذا يتعبك ويتعب ‏أهلك من حولك.‏
    ‏3-بالنسبة لتأنيب الضمير في تصرفك مع ابن عمك، نقول ما قال إسلامنا في الحديث ‏القدسي : "كل ابن آدم خطاء وخير الخطائين التوابون". واحرصي على أن تقابلي ‏خطيبك كابن عمك أو غيره بحضور أحد من أفراد الأسرة ولا تختلي به إلا بعد عقد ‏القران، وانظري إلى الحياة بعين جميلة واطلبي من الله العون على التقرب منه تعالى فإن ‏غُلِقَتْ جميع الأبواب فلن يغلق باب الخالق كيف وهو الرحمن الرحيم.‏

    وأخيراً أتمنى لك التوفيق، وراحة البال، والسلام عليك ورحمة الله وبركاته.‏

  • رد المستشار

    يمكنك التعرف على السيرة الذاتية للمستشار وإستشاراتة السابقة بالضغط على أسم المستشار

    • مقال المشرف

    إذا ارتاح الوالد.. تعب الولد

    "إذا ارتاح الوالد تعب الولد، وإذا تعب الوالد ارتاح الولد"، سمعت هذه العبارة من بعض كبار السن كثيرًا، وقد تجد أحدهم يبني عليها مواقف حياتية كبرى، بل يحكيها ب

      استطلاع الرأي

    هل تؤيد فعالية الأستشارة الاليكترونية في حل المشكلات؟
  • نعم
  • أحياناً
  • لا
    • المراسلات